ARNEDO TRAIL

Aurreko astean hainbat taldekidek eman bazioten hasiera mendi lasterketen denboraldi berriari, aste honetan Joseba Diaz azkoitiarraren txanda izan da. Arnedoko mendi lasterketarekin emango zion hasiera.

Trail Arnedo 26km eta +1050m dituen lasterketa da. Ibilbidearen zati handiena malda handirik ez duten pista zabaletan barrena da, hori dela eta Josebaren ezaugarrietara ondo egokitzen den ibilbidea dela esan dezakegu, azkarra baita da oso azkoitiar gaztea.

Aipatzekoa baita ere probak ematen dituen sari ekonomikoak direla eta, bertaratzen den lasterkarien maila oso handia izaten dela. Aurtengoan besteak beste, Luis Alberto Hernando edota Euskadiko selekzioko hainbat kide genituen. Nesketan ere Ohiana Kortazar eta Maite Maiora ere irteera marran ziren.

Espero zen bezala lasterketa hasierako erritmoa oso azkarra izan zen. Ibilbidearen lehenengo erdia goraka zen, eta bertan, Josebak atzetik aurrerako lasterketa eginez, ibilbideko partzialik gogorrenean 4. Denbora onena egitea lortu zuen. Ordekan azkarra izateaz gain maldan gora ere maila handia duela erakutsi zuen.

Maldan beherako zatia ziztu bizian egin eta gero, 5. Postuan sartu zen Arnedoko helmugan 2:05 denbora harrigarriarekin. Bere inguruko guztiak gara Josebak duen mailaren jakitun, baina igandean beste behin harrituta utzi gintuen lasterkari gazteak. Indartsu dator aurtengoan eta ziur bere maila erakutsiko duela bere aurtengo helburuetan: Trail de los Pastores edota Euskaltrails-en besteak beste.

ZORIONAK JOSEBA! SEGI HORRELA!