Taldekide berrien esperientzia

Gero eta taldekide gehiago ikusten ditugu Azkoitia eta Azpeitia tartean korrika, Jose Antonio Zulaika buru dutelarik. Eta zerbait ona egingo du, urtetik urtera jende gehiago baitu atzetik. Aurten ere 5 neska jator eta alai hasi dira taldean, eta denboraldia amaitu ostean, beraien iritzia jakin nahi izan dugu. Hauek dira Leire, Maite, Maria, Ainhoa eta Ceciliaren hitzak:

LEIRE BERISTAIN

Beti gustatu izan zait korrika egitea, txikitan Olatz Gabilondok ematen zizkigun gorputz-hezkuntzako klaseak eta korrika asko egiten genuen berarekin. Berak sustatu zidan korrika egiteko gogoa eta animatu ere egiten ninduen atletismoan hastera, baina nahiko lotsatia nintzen  garai hartan eta ez nintzen jende berria ezagutzera ausartzen. Denborak aurrera jarraitu zuen eta nire damua handiagotzen joan zen, nire anaia gaztea atletismoan hasi baitzen. Bere ilusio aurpegia ikusten nuen entrenamendutik etortzen zen bakoitzean, baina atletismoan hasteko beranduegi zela esaten nion neure buruari. Urte batzuk igaro dira ordutik eta azkenean animatu naiz atletismoan hastera.

Hasieran gogorra egingo zitzaidala uste nuen eta lehenengo entrenamendura beldurtuta joan nintzen, baina azkenean ez zela horren txarra konturatu nintzen. Jende berri asko ezagutu dut, laguntza handia eman didatena; entrenamenduak gogorrak izan arren eta beraiek ere nekatuta egon arren aurrera jarraitzeko animoak ematen dizkidatenak beti.

Lehenengo lasterketak ere uste baino lehenago iritsi ziren, beti izan naiz pesimista xamarra eta karreretakoa ez da atzean gelditzen. Beti gauzak gaizki egingo nituela uste nuen, baina azkenean taldekide, entrenatzaile eta gurasoen animoek laguntza handia eman didate eta azkenean pentsatu nuena baino gehiago gustatu zait. Harrituta gelditzen naiz karrera bakoitza amaitu ondoren taldekideek elkar animatzeko duten ahalmenarekin, animo horiek asko eskertzen dira. Horrez gain, Oropesara, Taldezkako Espainiako Txapelketara joateko aukera ere etorri zitzaigun, ilusioz bizi izan nuen esperientzia hura. Bertako oroitzapen onak gordetzen ditut. 2 egun soilik igaro arren bertan, bere kutsu guztia atera genien egun haiei.

 Urte oso ona izan da aurtengoa, oroitzapenez, lagun berriz eta aurrera jarraitzeko ilusioz betea.

MAITE ACEDO

Korrika egitea txikitatik atsegin dudan zerbait da, baino txikitan ez nintzen animatu lotsagatik.

Urte honetan lagunekin nengoenean atletismoko gaiak irten zuen eta Leirek aitortu zidan berari asko interesatzen zitzaiola eta ondo pentsatu eta gero apuntatzea erabaki genuen.Udaran goizetan ere korrika egitera joaten ginen noizean behin, ohitzeko! jajajaja.

Hasieran urduri nengoen taldeko asko ez nituelako ezagutzen eta ez nekien nolakoak ziren entrenamenduak eta beldurra ematen zidan atzean geratzeak. Gogoa eta beldurra biak batera.

Pare bat entrenamendu eta gero jendearekin arreman estuagoak izaten hasi nintzen eta oso eroso sentitzen naiz orain, taldeko bat gehiago naizela nabari dut.

Berriak gara batzuk baina jendeak oso ondo hartu gaitu  eta lagun giro bikaina dugu!! Denbora luzez nahi dut atletismon jarraitu, benetan maite dudan kirola aurkitu dut.

Oropesari dagokionez klasifikatu ginela esan zigutenean ilusio ikaragarria egin zigun, gainera nire lehengo urtean horrelako aukera bat izatea asko estimatu nuen. Bi egun izan ziren baino ondo aprobetxatutakoak. Leire, Jone, Ainhoa eta ni izan ginen neska bakarrak ekipoko beste guztiak mutillak ziren eta guztiak bizi osotik ezagutuko bagina bezala egon ginen.

Esan beharra daukat gurasoak ere ezin obeto pasa zutela jajaja.

MARIA GARATE

Nire lehen urtea izan da atletismoko talde batean, eta egia esan, oso esperientzia polita izan da, errepikatu eta edonori gomendatzeko modukoa.

Lehenago praktikatu izan ditut zenbait kirol, talde ezberdinetako kide izanez, baina inoiz ez korrika. Hasiera batean, beldur nintzen ez ote nuen maila ematea lortuko, taldean oso maila ona duen jendea baitago, goiko postuetan aritzen dena, baina taldekoek animatu ninduten eta pausoa ematea erabaki nuen, taldean izena eman nuen. Erabaki bikaina izan zen hura. Hasiera hasieratik izan dut taldekideen laguntza eta animoa, gauzak lortzeko ezinbesteko baldintza, hori gabe askotan lehenago emango bainuke amore. Taldean oso jende jatorra dugu, afariak, mendibueltak... plan ezberdinak antolatzeko beti prest dagoena. Egia da adin ezberdinetako jendea gaudela, baina oso ongi konpontzen gara eta horregatik dugu giro ezinobea taldean. Honek asko lagundu taldeko parte izaten, baita besteekin konfiantza hartzen ere.

Aurten ez dut karreretan parte hartu, lehen esan bezala, hasieran maila ez ematearen beldur nintzelako. Hala ere, konturatu naiz askotan zeure maila ematea dela beharrezkoa, eta horretarako ez dagoela beldurrik. Hori bai, lana egin behar da, zeuk jarritako helmugara heltzeko.

Amaitzeko, kirola egin nahi duen jende asko dagoela uste dut, baina ez dakiena zertan hasi. Ez diet taldean sartzeko esango, baina jakin dezatela oso kirol interesgarria dela, atal ezberdin asko dituena. Gainera praktikatzeko txandal bat eta gogoa besterik ez da behar!

AINHOA ARAMBARRI

Aurten apuntatu naiz Xeye atlestimo taldera. Beste kiroletan aritzen naizen arren, entrenatzaileak animatu ninduen korrika egitera.

Aurtengo esperientzia oso polita izan da: lasterketetan parte hartu izan dut eta lasterketa izan denean ere laguntzaile moduan lan egin dut. Esan beharra dago Xeye taldean izugarrizko giro polita dagoela. Entrenamentuak batzuetan gogorrak izan arren, beti duzu norbait aurrera egiten lagundu edo animatzen zaituena. Entrenamentuetan lagun asko egiten dira eta jendea ezagutzen da, eta hori afarietan ikustea besterik ez dago, baita lasterketetan korrikalariak animatzera joaten garenean ere. 

Hurrengo urteari begira jarraitzeko asmoa daukat. Izugarri ongi pasatu dut nahiz eta azkeneko hilabetean ikasten pasa dudan. Guztia ongi planteatu ez gero, dena egiteko denbora dago!

CECILIA MADRID

Ni aurten hasi naiz Xeye atletismo taldean eta asko gustatu zait esperientzia. Hasieran ez nengoen besteen erritmora ohituta eta gogorra egiten zitzaidan, hura bai sufrimendua! Entrenamendu erdia besteekin egitea ia ezinezkoa zitzaidan. Baina pixkanaka-pixkanaka, saiatuz eta ahal nuen entrenamendu gehienetara joanez, lortu dut besteen erritmo berean jartzea.

Taldean sartzeaz ez naiz batere damutzen, lagun berriak egin ditut eta kirola eginez momentu onak pasa izan ditut. Ez dakit hurrengo urtean non egongo naizen ikisten, baina taldean jarraitzea gustatuko litzaidake.